Gott fylgi vinstri flokkanna

Ef niðurstöður kosninga verða með þeim hætti sem nýjasta könnun Gallup, fyrir Morgunblaðið og Ríkisútvarpið, bendir til geta vinstri flokkarnir tveir verið ágætlega sáttir við niðurstöðuna. Samtals er fylgi Samfylkingar og vinstri grænna 42,1%, sem er 2,6% fylgisaukning frá síðustu kosningum. Samanlagt fylgi vinstri flokkanna hefur ekki verið meira frá kosningunum 1978 þegar þeir fengu alls 44,9%.

Frá árinu 1971 hafa vinstri flokkarnir fengið að meðatali 38,6% atkvæða, ef niðurstaða nú í maí verður í takt við könnun Gallup. Meðalfylgi Sjálfstæðisflokksins er hins vegar nokkru minna eða 36,5%. Vert er þó að hafa í huga að árið 1987 fékk Sjálfstæðisflokkurinn aðeins 27,2% atkvæða, en það ár bauð Borgaraflokkurinn fram undir forystu Alberts Guðmundssonar og fékk 10,9%.

Aðeins tvisvar sinnum á þessum tímabili hefur Sjálfstæðisflokkurinn fengið meira fylgi, en samanlagt fylgi vinstri flokkanna, 1974 og 1999. Árið 1991 var fylgi hægri og vinstri í raun jafnt þar sem munaði aðeins 0,4%.

 

	Vinstri flokkarnir	Sjálf-stæðis-flokkurinn
1971	36,5	36,2
1974	32,0	42,7
1978	44,9	32,7
1979	37,1	35,4
1983	41,8	38,7
1987	38,8	27,2
1991	38,2	38,6
1995	37,8	37,1
1999	35,9	40,7
2003	39,8	33,7
2007	42,4	39,1

Þeir vinstri flokkar sem hafa boðið fram einu sinni eða oftar frá árinu 1971 eru: Alþýðuflokkur, Alþýðubandalag, Samtök frjálslyndra og vinstrimanna, Bandalag jafnaðarmanna, Þjóðvaki og Kvennalistinn, Samfylkingin og Vinstri hreyfingin grænt framboð.

Niðurstaða könnunar Gallup er hins vegar athyglisverð, því svo virðist sem vinstri-grænir hafi náð að snúa aftur vörn í sókn, en sá byr sem virtist vera í seglum Samfylkingarinnar er horfinn. Könnunin bendir einnig til þess að ríkisstjórnin haldi velli með 32 þingmenn, sem fyrir 12 árum þótti of lítill meirihluti til að Davíð Oddson héldi áfram samstarfinu við Jón Baldvin Hannibalsson. Svo virðist sem Jón Baldvin hafi aldrei fyrirgefið þá ákvörðun.

Athugasemdir

[Jón Ingi Cæsarsson, 29.4.2007 kl. 20:58]

Það varð smá frestun á almennilegri sameiningu vinstri og miðjumanna þegar ullarjakkinn úr Þistilfirði varð að slíta sig frá því hann langaði svo til að vera formaður. En sú sameining mun mjakast á leiðarenda þegar hann er farinn og skynsamari menn ráða ferð á þeim bænum.

[Þórdís Bára Hannesdóttir, 30.4.2007 kl. 00:08]

Mikið rétt hjá Jón Inga.  

[Freyr Þórarinsson (IP-tala skráð) 30.4.2007 kl. 08:32]

Þetta er fróðleg greining á vinstri-hægri sveiflum, en mér mundi leggja tvennt til: Að Borgarflokkurinn teljist með Sjálfstæðisflokknum 1987 (af augljósum ástæðum) og að Kvennalistinn sé ekki talinn með vinstri flokkum, vegna þess að þær sem fyrir hann störfuðu komu úr ýmsum pólitískum áttum og fóru að lokum hver sína leið.