Mikilvæg vika fer í hönd

Allir bankarnir munu birta afkomu sína á liðnu ári í þessari viku. Landsbankinn birtir fyrstur afkomuna eftir lokun markaðar í dag. Glitnir kynnir afkomu liðins árs á morgun sem og Straumur Burðarás. Kaupþing birtir afkomuna á fimmtudag sama dag og Exista, sem jafnframt er stærsti hluthafi bankans. FL Group leggur spilin á borðin 13. febrúar næstkomandi.

Mikil eftirvænting er vegna uppgjörs bankanna og bíða fjárfestar milli vonar og ótta. Hvernig afkoma þessara fyrirtækja var í reynd á síðasta ársfjórðungi síðasta árs mun hafa mikil áhrif á það hvernig hlutabréfamarkaðurinn þróast á komandi vikum og mánuðum.

Athugasemdir

[Ívar Pálsson, 28.1.2008 kl. 16:02]

Staðan á áramótum skipti vissulega máli, en síðan féll markaðsvirði bankanna hrikalega fyrstu vikuna eftir þann uppgjörsdag. Markaðurinn hlýtur að hafa gert ráð fyrir slæmum 4. ársfjórðungi, þannig að ekki þarf endilega að vera að uppgjörin breyti neinu um hlutabréfaverð, nema þá t.d. að óvæntar afskriftir eða aðrar uppákomur birtist þessa daga. Það er rétt, fjárfestar hljóta að bíða á milli vonar og ótta.